2026-09-28
Стэйблкойны журмуудын төсөлд олон нийтээс санал авч байна.
АНУ-ын Холбооны нөөцийн сан (Fed) 2026 оны 9 дүгээр сарын 24-ний өдөр стэйблкойн гаргагчдад чиглэсэн хяналт, зохицуулалтын хоёр том журмын төслийг албан ёсоор танилцуулж, олон нийтийн санал асуулгыг эхлүүллээ. Тус улсад өнгөрсөн жил батлагдсан "GENIUS Act" хуулийг бодит ажил хэрэг болгох хүрээнд хийгдэж буй энэхүү шинэчлэл нь уламжлалт банкууд болон крипто компаниудын стэйблкойн (дижитал доллар) гаргах үйл ажиллагаанд түүхэн дэх хамгийн хатуу стандартыг тогтоож байна. Зах зээлийг илүү эрүүл, эрсдэлгүй болгох зорилготой уг журмын хамгийн гол заалт нь стэйблкойн гаргагч компаниуд (Жишээ нь: USDT, USDC гаргагчид) эргэлтэд байгаа дижитал койн бүрээ АНУ-ын богино хугацаатай засгийн газрын бонд болон бэлэн мөнгөтэй дүйцэхүйц, асар өндөр хөрвөх чадвартай хөрөнгөөр 100 хувь баталгаажуулж, хадгалах шаардлага юм. Хэрэв крипто зах зээлд ямар нэгэн хямрал болж, иргэд дижитал доллароо жинхэнэ доллар болгож авахаар нэгэн зэрэг хандвал компаниуд ажлын 2 өдрийн дотор хөрөнгийг нь ямар ч саадгүйгээр 1:1 харьцаагаар буцаан олгох үүрэг хүлээнэ. Хэрэв нөөц хөрөнгө нь тодорхой шалтгаанаар дутагдвал Төв банканд нэн даруй мэдэгдэх ёстой бөгөөд энэ нь урьд өмнө гарч байсан алгоритмт стэйблкойнуудын дампуурал шиг эрсдэлээс хэрэглэгчдийг бүрэн хамгаалах зорилготой юм.
Үүний зэрэгцээ шинэ журмаар компаниудад тодорхой зээлийн болон үйл ажиллагааны эрсдэлээс сэргийлэх "эрсдэлийн сан буюу өөрийн хөрөнгийн заавал байх нөөц"-ийг бүрдүүлэх шаардлагыг тусгажээ. Мөн стэйблкойн эзэмшиж буй иргэдэд зөвхөн койн хадгалсных нь төлөө компаниудын зүгээс ямар нэгэн хүү эсвэл шууд ашиг хуваарилах хөтөлбөр хэрэгжүүлэхийг хатуу хориглосон байна. Холбооны нөөцийн сан нь банкууд өөрсдөө стэйблкойн гаргах тусгай охин компани байгуулах зааврыг нарийвчлан гаргасан бөгөөд тэдгээр банкууд маш нарийн бизнес төлөвлөгөө, санхүүгийн тайлан, эрсдэлийн удирдлагын баримт бичгээ Fed-д илгээн 120 хоногийн турш хянуулах шаардлагатай тулгарч байна.
Эх сурвалж:
https://www.federalreserve.gov/newsevents/pressreleases/bcreg20260924a.htm